भारतीय स्टार ब्याट्सम्यान विराट कोहलीले कप्तान रोहित शर्मालाई उछिन्दै एकदिवसीय अन्तर्राष्ट्रिय क्रिकेटको आईसीसी ब्याटिङ वरीयतामा पुनः पहिलो स्थान हासिल गरेका छन्। यससँगै रोहित शीर्ष स्थानबाट खस्दै तेस्रो स्थानमा सीमित भएका छन्।

न्युजिल्यान्डविरुद्धको पहिलो एकदिवसीय खेलमा कोहलीले ९१ बलमा ९३ रनको शानदार पारी खेलेपछि वरीयतामा उक्लिन सफल भएका हुन्। सो खेलमा भारतले न्युजिल्यान्डले दिएको ३ सय रनको लक्ष्य सफलतापूर्वक पछ्याएको थियो, जसमा कोहलीको प्रदर्शन निर्णायक रह्यो।

आईसीसीको पछिल्लो वरीयता अद्यावधिकअनुसार कोहली करिअरमा ११औँ पटक ओडीआई ब्याटरको नम्बर एक स्थानमा पुगेका छन्। उनी पहिलोपटक सन् २०१३ को अक्टोबरमा शीर्ष स्थानमा पुगेका थिए। हालसम्म उनले नम्बर एक स्थानमा ८२५ दिन बिताइसकेका छन्, जुन कुनै पनि भारतीय ब्याटरका लागि सर्वाधिक हो।

समग्र विश्व सूचीमा भने कोहली दशौँ स्थानमा रहेका छन्। ओडीआई क्रिकेटमा सबैभन्दा धेरै दिन शीर्ष स्थानमा रहने कीर्तिमान वेस्ट इन्डिजका महान ब्याट्सम्यान विवियन रिचर्ड्सको नाममा छ। पछिल्ला चार एकदिवसीय खेलमा कोहलीले क्रमशः ७४, १३५, १०२ र ६५ रन बनाएका थिए। हाल अन्तर्राष्ट्रिय क्रिकेटमा उनी सक्रिय रहेको एकमात्र ढाँचा पनि ओडीआई नै हो।

उता, पहिलो ओडीआईमा रोहित शर्मा २६ रनमै आउट भएपछि वरीयतामा तल झरेका हुन्। न्युजिल्यान्डका ड्यारिल मिचेल भने सो खेलमा ७१ बलमा ८४ रन बनाउँदै तेस्रो स्थानबाट दोस्रो स्थानमा उक्लिएका छन्। हाल वरीयतामा कोहलीको ७८५ अंक, मिचेलको ७८४ र रोहितको ७७५ अंक रहेकाले आगामी खेलहरूमा वरीयतामा फेरबदल हुने सम्भावना कायमै रहेको छ।