काठमाडौं | अर्थमन्त्री रामेश्वर खनालले सुदूरपश्चिम प्रदेशसँग प्रत्यक्ष रूपमा जोडिएका महत्वपूर्ण विकास योजनाहरूलाई अघि बढाउन सरकार प्रतिबद्ध रहेको बताएका छन्। धनगढीमा सोमबार उद्घाटन भएको सुदूरपश्चिम महोत्सवको १९औँ संस्करणमा बोल्दै उनले प्रदेशमा अभाव रहेको ठूला पूर्वाधार परियोजना सञ्चालनमा आफूले प्राथमिकता दिने स्पष्ट गरे।

मन्त्री खनालका अनुसार नयाँ सरकारको प्राथमिक दायित्व निर्वाचन सफलतापूर्वक पूरा गर्नु भए पनि, आफ्नो कार्यकालभित्र गर्न सकिने विकास परियोजनालाई कदापि रोकिँदैन। उनले दोधारा–चाँदनी सुक्खा बन्दरगाह तथा दशरथ चन्द स्वास्थ्य विज्ञान विश्वविद्यालय जस्ता महत्वपूर्ण परियोजनालाई छिटो सञ्चालनमा ल्याउन पहल थालिने बताए।

महोत्सवको आयोजना समितिका अध्यक्ष तथा कैलाली उद्योग वाणिज्य संघका प्रमुख पुष्करराज ओझाले विगत केही वर्ष कोभिड महामारी र जेन–जी आन्दोलनका कारण सुस्त बनेको अर्थतन्त्रलाई पुनः गतिशील बनाउन महोत्सवले सकारात्मक भूमिका खेल्ने विश्वास व्यक्त गरे।

पुस २ गतेसम्म चल्ने महोत्सवमा कृषि, जडिबुटी, हस्तकला, फर्निचर, अटोमोबाइल, कपडा, होटल तथा सूचना प्रविधिसहित पाँच सयभन्दा बढी स्टल रहनेछन्। महोत्सव अवधिभर करिब १५ करोड रुपैयाँ बराबरको कारोबार हुने र सात लाखभन्दा बढी दर्शकले अवलोकन गर्ने अपेक्षा आयोजकले गरेको छ।