काठमाडौं । डिजिटल बहुउद्देश्यीय सहकारी संस्था लिमिटेडको चौथो साधारण सभा संस्थाका शेयर सदस्य तथा समाजसेवी सुमीत्रा अर्यालको अध्यक्षतामा भव्य तथा सभ्य वातावरणमा सम्पन्न भयो। सहकारीको वार्षिक उपलब्धि, आर्थिक पारदर्शिता, भविष्यका दीर्घकालीन योजनाहरू तथा संस्थागत सुदृढीकरणबारे विस्तृत छलफल गर्दै सभाले आगामी कार्यदिशा र लक्ष्यका सम्बन्धमा महत्वपूर्ण निर्णयहरू पारित गर्‍यो। कार्यक्रममा प्रमुख अतिथिका रूपमा कृषि विकास बैंकका पूर्व उप–महाप्रबन्धकको सहभागिताले कार्यक्रमको गरिमा थप उचो बन्यो। प्रमुख अतिथिले सहकारीलाई राष्ट्रको आर्थिक मेरुदण्डको रूपमा उल्लेख गर्दै डिजिटल बहुउद्देश्यीय सहकारीले पछिल्ला वर्षमा देखाएको प्रगतिप्रति प्रशंसा व्यक्त गरे। उनले सहकारीहरूले पारदर्शिता, सुशासन, सदस्य–हित र प्रविधि–मैत्री सेवालाई उच्च प्राथमिकतामा राख्नुपर्नेमा जोड दिँदै डिजिटलिकरण, कर्जा व्यवस्थापन, उद्योग प्रोत्साहन, महिला सशक्तिकरण र स्थानीय अर्थतन्त्र विकासमा सहकारीले अझ प्रभावकारी काम गर्न सक्ने विश्वास व्यक्त गरे।

सभामा सह–व्यवस्थापक आशुतोष मिश्रले वार्षिक लेखा परीक्षण प्रतिवेदन, आय–व्यय विवरण, पूँजी स्थिति, कर्जा प्रवाह, सदस्य विस्तार, आर्थिक स्थायित्व तथा सहकारीको समग्र वित्तीय मूल्यांकन विस्तृत रूपमा प्रस्तुत गरे। उनले विगत वर्षमा वित्तीय अनुशासन, लेखा व्यवस्थापन, आन्तरिक नियन्त्रण प्रणाली तथा डिजिटल अभिलेखीकरणलाई विशेष प्राथमिकताका साथ कार्यान्वयन गरिएको जानकारी दिए। मिश्रले आगामी वर्षमा डिजिटल भुक्तानी प्रणालीको विस्तार, अनलाइन सेवा सुधार, लेखा प्रणालीमा अत्याधुनिक प्रविधिको समावेश तथा पारदर्शी अडिट प्रक्रियालाई थप मजबुत बनाइने प्रतिबद्धता व्यक्त गरे।

सभाले सर्वसम्मत रूपमा नौ सदस्यीय नयाँ सञ्चालक समिति चयन गरेको घोषणा गर्‍यो। नव–निर्वाचित अध्यक्ष दीपक चन्द्र गौतम, उपाध्यक्ष राकेश महर्जन, सचिव अशोक खनाल, कोषाध्यक्ष युदेश सिंह महर्जन तथा सदस्यहरू बीरन बज्र बज्राचार्य, अशोक पुडासैनी, कमला डंगोल, इन्दिरा महर्जन र जनक अधिकारीले सहकारीलाई डिजिटल, पारदर्शी, उत्तरदायी तथा सदस्य–केन्द्रित बनाउन संयुक्त रूपमा काम गर्ने प्रतिवद्धता जताए। अध्यक्ष गौतमले सहकारीलाई प्रविधिसँग जोडेर, आर्थिक पारदर्शितालाई पहिलो प्राथमिकतामा राखेर तथा सदस्यहरूको आवश्यकता र अपेक्षा अनुसार सेवा विस्तार गर्दै संस्थालाई आधुनिक र सबल बनाइने बताए। उनले सदस्यहरूको निरन्तर विश्वास, साथ र सुझावले नै सहकारीलाई दीर्घकालीन आर्थिक स्थायित्वतर्फ उन्मुख गराउने उल्लेख गरे।

यसैगरी, साधारण सभाले विभिन्न समितिहरूको पुनर्गठन पनि गर्‍यो। सल्लाहकार समितिमा प्रमुख सल्लाहकार ध्रुव चन्द्र गौतम (पूर्व उप–महा–प्रबन्धक, कृषि विकास बैंक), सल्लाहकार शंकर अर्याल (पूर्व सह–सचिव, नेपाल सरकार), डा. राजु लामा पी. कोन्दन (उपाध्यक्ष संयुक्त राष्ट्र संघ सुरक्षा परिषद् एवं युनाइटेड नेचर इन्टरनेसनल पिस नेपाल च्याप्टरका अध्यक्ष) तथा हरि कृष्ण श्रेष्ठ (प्रधानाध्यापक, गीतामाता मावि) सम्मिलित भए। उच्च व्यवस्थापन समितिको संयोजकमा बासु प्रसाद न्यौपाने रहेका छन्, भने शंकर अर्याल र डा. राजु लामा सदस्यका रूपमा रहँदैछन्। लेखा उप–समितिको संयोजकमा रमेश चन्द्र गौतम, कर्जा उप–समितिको संयोजकमा राकेश महर्जन र उद्योग उप–समितिको संयोजकमा मदन विकास महर्जन चयन गरिएको छ। महिलामैत्री सेवा विस्तारका लागि महिला उप–समितिको संयोजकमा कमला डंगोललाई जिम्मेवारी दिइएको छ।

सभामा १२ कक्षा उत्तीर्ण गरेका शेयर सदस्यका छोरा–छोरीलाई सम्मान, निःशुल्क बैंक खाता तथा नगद पुरस्कार वितरण गरिएको थियो। साथै, सहकारीमा योगदान पुर्‍याएका पूर्व कर्मचारीहरूलाई सम्मान तथा हाल कार्यरत कर्मचारीहरूलाई प्रशंसा पत्र प्रदान गरियो। यसले सहकारीको सामाजिक उत्तरदायित्व, प्रेरणादायी कार्यसंस्कृति र सदस्य–केन्द्रित भावना झनै स्पष्ट पारेको छ।

अन्त्यमा, अध्यक्ष गौतमले सबै शेयर सदस्य, पदाधिकारी, कर्मचारी तथा समितिका सदस्यहरूप्रति कृतज्ञता व्यक्त गर्दै सहकारीलाई आधुनिक, डिजिटलिकृत, पारदर्शी तथा उदाहरणीय संस्थामा रूपान्तरण गर्ने आफ्नो संकल्प दोहोर्‍याए। उनले सहकारीलाई केवल वित्तीय संस्था नभई विश्वास, पारदर्शिता, सहकार्य र साझा विकास दृष्टिकोणमा आधारित परिवारको रूपमा अघि बढाइने बताएका थिए। सभाले दिएको विश्वास र जिम्मेवारीले आफूलाई थप प्रेरित बनाएको उल्लेख गर्दै उनले सहकारीलाई देशकै अग्रणी सहकारीका रूपमा स्थापना गर्ने दीर्घकालीन लक्ष्यका साथ नयाँ कार्यसमिति पूर्ण ऊर्जा र दृढताका साथ अघि बढ्ने प्रतिबद्धता जनाए।