काठमाडौँ, असार १८ | नेपाली राष्ट्रिय महिला फुटबल टोलीले आज एएफसी महिला एसिया कप छनोट प्रतियोगिता अन्तर्गत श्रीलंकासँग खेल्दैछ। उज्बेकिस्तानको राजधानी ताशकन्दस्थित मिल्ली (राष्ट्रिय) स्टेडियममा हुने यो खेल नेपाली समय अनुसार साँझ ६:१५ बजे सुरु हुने तय गरिएको छ।

विश्व फुटबलको सर्वोच्च संस्था फिफाको वरियतामा नेपाल श्रीलंकाभन्दा अगाडि रहेको छ। हाल नेपाल महिला टोली १००औं स्थानमा छ भने श्रीलंका १५९औं स्थानमा रहेको छ, जसले नेपाललाई कागजमा बलियो टोलीका रूपमा देखाउँछ।

छनोट प्रतियोगितामा नेपालले आफ्नो पहिलो खेलमा लाओसलाई ९-० गोलअन्तरले पराजित गर्दै ऐतिहासिक जित दर्ता गरेको थियो। अर्कोतर्फ, श्रीलंका उज्बेकिस्तानसँग १०-० को ठूलो अन्तरले पराजित भएको थियो।

यसै समूहमा आजै अर्को खेल उज्बेकिस्तान र लाओसबीच पनि हुनेछ।
नेपालको अर्को प्रतिस्पर्धा जुलाई ५ (असार २१) मा आयोजक टोली उज्बेकिस्तानसँग हुनेछ।

यस प्रतियोगिताका लागि नेपाली टिमका मुख्य प्रशिक्षक प्याट्रिक डी वाइल्डले २१ खेलाडीको टोली घोषणा गरिसकेका छन्।

नेपाली टोलीको नामावली यसप्रकार छ:

गोलकिपरहरू:
– अञ्जिला तुम्बापो सुब्बा
– उषा नाथ
– अञ्जना राना मगर

डिफेन्डरहरू:
– गीता राणा
– निशा थोकर
– समीक्षा घिमिरे
– मनमाया दमाई
– प्रतिक्षा चौधरी
– विमला विक
– पूजा राणा
– अमृता जैशी

मिडफिल्डरहरू:
– विमला चौधरी
– अनिता बस्नेत
– रेणुका नगरकोटी
– प्रीति राई
– सरु लिम्बु
– सविता राना मगर
– सरस्वती हमाल

फरवार्डहरू:
– सावित्रा भण्डारी
– रश्मी कुमारी घिसिङ
– चन्द्र भण्डारी
– अनिता केसी
– रेखा पौडेल

नेपाली टिमका लागि आजको खेल महत्त्वपूर्ण छ, किनभने जित हात पार्न सकेमा अन्तिम खेलअघि नै नेपाल प्रतियोगितामा बलियो स्थितिमा उभिन सक्नेछ। सावित्रा भण्डारीको कप्तानीमा रहेको नेपाली टिम उच्च मनोबलमा छ, र श्रीलंकाविरुद्धको खेलमा पनि जितको अपेक्षा गरिएको छ।