आईसीसी क्रिकेट विश्वकप लिग ‘टू’ अन्तर्गत यूएईमा जारी सिरिजमा अमेरिकाले शानदार प्रदर्शन गर्दै लगातार दोस्रो जित दर्ता गरेको छ। मंगलबार यूएई र अमेरिकाबीच सम्पन्न खेलमा पाहुना टोलीले घरेलु यूएईलाई चार विकेटले पराजित गर्दै अंकतालिकाको शीर्षस्थानमा आफ्नो पकड अझै मजबुत बनाएको हो।

यो खेल यूएईका पाँच नयाँ खेलाडीका लागि डेब्यु अवसर पनि बन्यो। टस जितेर पहिले फिल्डिङ रोजेको अमेरिकासामु यूएईले ५० ओभरमा नौ विकेटको क्षतिमा २११ रनको मध्यम स्कोर बनायो। ओपनर आर्यन्श शर्मा र अलीशान शराफु छिट्टै आउट भएपछि यूएई दबाबमा परेको थियो। त्यसपछि मोहम्मद शाहदादले ३४ रन, कप्तान राहुल चोप्राले ३६ रन, र सोएब खानले २७ रनको योगदान दिए। हर्षित कौशिकले अन्तिमतिर उत्कृष्ट ब्याटिङ गर्दै ५३ रन जोडे र टोलीलाई सम्मानजनक स्कोरमा पुर्‍याए।

अमेरिकाका कप्तान सौरभ नेत्रवाल्करले उत्कृष्ट बलिङ गर्दै ३ विकेट हात पारे भने जसदीप सिंह र शुभम रञ्जनेले दुई-दुई विकेट जोडे। रशिल उगाकरले पनि एक विकेट लिए।

२१२ रनको लक्ष्य पछ्याउने क्रममा अमेरिकाले पनि कमजोर सुरुवात गर्‍यो। समित पटेल शून्य, एन्ड्रियस गस एक, र सइतेजा मुक्कमल्ला ८ रनमा आउट हुँदा २२ रनमै तीन विकेट गुमायो। तर, तेस्रो नम्बरका मोनांक पटेलले संयमित ब्याटिङ गर्दै ६७ बलमा ५० रन बनाए र टोलीलाई स्थिरता दिए।

त्यसपछि सयन जाहान्गिरले १८ रन जोडे भने मिलिन्द कुमार र शुभम रञ्जनेले ७३ रनको महत्वपूर्ण साझेदारी गरे। मिलिन्दले ८१ बलमा ७१ रनको प्रभावशाली पारी खेले भने शुभमले अन्त्यसम्म अविजित रहँदै ४६ रन बनाए र टोलीलाई जितसम्म पुर्‍याए।

यूएईका बलरहरू जुनैद सिद्दकीले तीन र सिमरनजित सिंहले दुई विकेट लिएका थिए, तर उनीहरूले अमेरिकाको जित रोकेनन्। यो यूएईको सिरिजको पहिलो खेल भए पनि अमेरिकाको दोस्रो लगातार जित हो।

यसअघि अमेरिकाले पहिलो खेलमा नेपाललाई एक सय छ रनले हराएको थियो। अब यूएईले बिहीबार नेपालसँग प्रतिस्पर्धा गर्नेछ। २२ खेलबाट ३२ अंक जोडेको अमेरिकाले दोस्रो स्थानमा रहेको स्कटल्यान्डलाई दुई अंकले पछि पार्दै शीर्ष स्थानमा उक्लिएको छ। यसैबीच, नेपालसँग १२ र यूएईसँग ६ अंक छन्, जसले उनीहरूलाई क्रमशः सातौं र आठौं स्थानमा राखेको छ।