मैत्रीपूर्ण खेलमा नेपालले भारतलाई पेनाल्टी सुटआउटमा ३–० ले हराउँदै शानदार जित हात पारेको छ। सिक्किमको पाल्जोर रंगशालामा भएको खेलको नियमित ९० मिनेटको समयमा दुवै टोलीले १–१ गोलको बराबरी खेलेका थिए। पहिलो हाफमा दुवै पक्ष आक्रामक देखिए पनि दोस्रो हाफमा कुनै गोल हुन सकेन।

नेपालको पोस्ट सुरुवाती ९० मिनेटसम्म गोलकिपर उषा नाथले सुरक्षित राखिन्। खेल बराबरीमा पुग्नेबित्तिकै प्रशिक्षक नवीन न्यौपानेले पेनाल्टी विशेषज्ञ अन्जना राना मगरलाई मैदानमा पठाए। उनको उपस्थितिले खेलको रूपान्तरण गर्‍यो — उनले भारतका दुई पेनाल्टी रोक्दै नेपालको जित सुनिश्चित गरिन्।

नेपालको तर्फबाट सविता राना मगर, रश्मी कुमारी घिसिङ र निशा थोकरले पेनाल्टीमा गोल गरे। अनिता बस्नेतको प्रहार भने पोस्ट बाहिर गएको थियो। पहिलो दुई पेनाल्टी गोल भएपछि तेस्रो असफल प्रहारले केही दबाब ल्याएको थियो, तर चौथो पेनाल्टीमा निशा थोकरले निर्णायक गोल गर्दै नेपाललाई विजयी बनाइन्।

भारतका लागि प्रियादर्शनीले पहिलो पेनाल्टी प्रहार गर्दा अन्जनाले उत्कृष्ट बचाउ गरिन्। दोस्रो प्रहार सन्तोषले पोस्ट माथि पठाइन्, र तेस्रो पेनाल्टी अष्टम ओरमको प्रहार पनि अन्जनाले सजिलै नियन्त्रणमा लिइन्।

खेलको ३०औं मिनेटमा भारतकी सोमिया गुगलोथले दुई डिफेन्डर र गोलकिपरलाई छल्दै गोल गर्दै टोलीलाई अग्रता दिलाएकी थिइन्। तर पहिलो हाफको थप समयको दोस्रो मिनेटमा नेपालकी रश्मी कुमारी घिसिङले अनिता बस्नेतको कर्नरमा हेड गर्दै बराबरीको गोल फर्काइन्।

७१औं मिनेटमा भारतले अग्रता लिन ठूलो मौका पाए पनि गोलकिपर उषा नाथले उत्कृष्ट बचाउ गरिन्। ७९औं मिनेटमा सविता राना मगरले पनि गोलको सुनौलो अवसर गुमाइन्। त्यसपछि खेल बराबरीमै सकियो र पेनाल्टी सुटआउटमा नेपाल विजयी भयो।

यसअघि पनि नेपालले त्रिदेशीय सिरिजमा भारतलाई २–१ ले पराजित गरेको थियो, र यो जितले नेपाली महिला फुटबल टोलीको आत्मविश्वास झन् बलियो बनाएको छ।