काठमाडौं । स्पेनका युवा टेनिस स्टार कार्लोस अल्काराजले करियर ग्रान्डस्लाम पूरा गर्दै टेनिस इतिहासमा नयाँ कीर्तिमान कायम गरेका छन्। आइतबार भएको रोमाञ्चक फाइनल जित्दै २२ वर्षीय अल्काराजले सबैभन्दा कम उमेरमा चारै ग्रान्डस्लाम जित्ने पुरुष खेलाडीको उपलब्धि हासिल गरेका हुन्।

फाइनलमा अल्काराजले सर्बियाका अनुभवी खेलाडी नोभाक जोकोभिचविरुद्ध शानदार पुनरागमन गरे। खेलको सुरुआती चरणमा ३८ वर्षीय जोकोभिचले आफ्नो अनुभवको भरमा खेललाई नियन्त्रणमा राख्दै पहिलो सेट ६–२ ले जितेका थिए। तर त्यसपछि अल्काराजले बेसलाइनबाट आक्रामक खेल प्रस्तुत गर्दै खेलको लय आफ्नो पक्षमा फर्काए।

अल्काराजले दोस्रो र तेस्रो सेट क्रमशः ६–२ र ६–३ ले जिते भने निर्णायक चौथो सेट ७–५ ले आफ्नो पक्षमा पार्दै उपाधिमा कब्जा जमाए। ऐतिहासिक जितपछि उनी भावुक हुँदै कोर्टमै ढलेर खुशी साटिरहेका देखिएका थिए।

हार बेहोरे पनि ३४ पटकका ग्रान्डस्लाम विजेता जोकोभिचले खेल भावना प्रस्तुत गर्दै नेट पार गरेर अल्काराजलाई अँगालो हाले। यस हारसँगै जोकोभिचको २५औँ ग्रान्डस्लाम उपाधि जित्ने प्रयास सफल हुन सकेन।

खेलपछि १० पटकका अष्ट्रेलियन ओपन विजेता जोकोभिचले भविष्यप्रति अनिश्चितता व्यक्त गर्दै आगामी ६ देखि १२ महिनामा के हुने हो भन्न नसक्ने प्रतिक्रिया दिए। मेलबर्नमा फेरि खेल्ने वा नखेल्ने विषयमा समेत उनले खुला रूपमा शंका व्यक्त गरे।

यो उपाधि अल्काराजको करियरको सातौँ ग्रान्डस्लाम उपाधि हो। उनले सबैभन्दा कान्छो उमेरमा सबै ग्रान्डस्लाम जित्ने जोकोभिचकै पुरानो कीर्तिमान तोड्दै चारै ग्रान्डस्लाम जितेर इतिहास रच्ने नवौँ पुरुष खेलाडीका रूपमा आफ्नो नाम दर्ज गराएका छन्।