इजरायल र इरानबीचको तनाव अहिले गम्भीर युद्धको सिमा नाघ्ने चरणमा पुगेको छ। पछिल्ला २४ घण्टाभित्र दुबै पक्षबाट भएका आक्रमण र प्रतिआक्रमणले सम्पूर्ण मध्यपूर्वलाई अस्थिरताको खतरातर्फ धकेलेको छ।

इजरायली सेनाले इरानबाट करिब सय ड्रोन प्रहार गरिएको पुष्टि गर्दै तीमध्ये अधिकांशलाई आफ्नो हवाई सुरक्षा प्रणालीले निष्क्रिय पारेको जनाएको छ।

यसको जवाफमा, इजरायलले इरानका आणविक कार्यक्रमसँग जोडिएका संरचना, ब्यालिस्टिक मिसाइल उत्पादन केन्द्रहरू र प्रमुख सैन्य तथा रणनीतिक ठेगानाहरूमा लक्षित आक्रमण गरेको दाबी गरेको छ।

आक्रमणमा इरानी क्रान्तिकारी गार्डका प्रमुखसहित उच्च तहका अधिकारीहरू मारिएको दाबी गरिएको छ। इरानले पनि छ जना वैज्ञानिकको मृत्यु भएको र केही बालबालिकासहित सर्वसाधारणको ज्यान गएको जानकारी दिएको छ। यद्यपि, यी विवरणहरूको स्वतन्त्र पुष्टि हालसम्म भइसकेको छैन।

इरानी राष्ट्रपति इब्राहिम रईसीले इजरायलको कारबाहीलाई “मुर्खतापूर्ण निर्णय” भन्दै त्यसको जवाफमा कडा कदम चालिने चेतावनी दिएका छन्।

यसबीच, इजरायलले विश्वभरिका आफ्ना दूतावासहरू अस्थायी रूपमा बन्द गरेको छ। विदेशमा रहेका आफ्ना नागरिकहरूलाई राष्ट्रिय चिन्हहरू प्रयोग नगर्न र आफ्नो स्थिति तुरुन्तै विदेश मन्त्रालयलाई जानकारी गराउन निर्देशन दिइएको छ। साथै, सबै कन्सुलर सेवाहरू हाल स्थगित गरिएको जनाइएको छ।

साथै, संयुक्त राष्ट्रसंघ अन्तर्गतको अन्तर्राष्ट्रिय आणविक ऊर्जा एजेन्सी (IAEA) ले इजरायली आक्रमणसँग सम्बन्धित आपतकालीन बैठक आह्वान गर्ने तयारी गरिरहेको छ।