लण्डन | बेलायती प्रधानमन्त्री किअर स्टार्मरले आगामी सेप्टेम्बरमा हुने संयुक्त राष्ट्रसंघको महासभामा प्यालेस्टाइनलाई स्वतन्त्र राष्ट्रको रूपमा मान्यता दिने तयारी रहेको बताएका छन्।

प्रधानमन्त्री स्टार्मरले मन्त्रिपरिषद्को आकस्मिक बैठकपछि आयोजित पत्रकार सम्मेलनमा भने, "यदि इजरायलले बेलायतले अघि सारेका सर्तहरू नमानेमा, प्यालेस्टाइनलाई औपचारिक रूपमा स्वतन्त्र राष्ट्रको मान्यता दिइनेछ।"

उनले गाजामा विद्यमान मानवीय संकटको अन्त्य गर्न इजरायली सरकारले तुरुन्त युद्धविरामको घोषणा गर्नुपर्ने र दीर्घकालीन शान्ति प्रक्रियाप्रति प्रतिबद्धता जनाउनुपर्ने आवश्यकता औंल्याए।

यसबाहेक, स्टार्मरले हमासलाई पनि गाजामा राखिएका सबै बन्धकलाई तत्काल रिहा गर्न आग्रह गरे। तर, गाजामा हमासद्वारा बन्धक बनाइएका इजरायली नागरिकका परिवारले बेलायतसहित युरोपका केही देशहरूले प्यालेस्टाइनलाई मान्यता दिने योजनाको विरोध गरेका छन्। उनीहरूले यस्तो कदम ‘आतंकवादलाई वैधता दिने प्रयास’ भएको आरोप लगाएका छन्।

यता, गाजास्थित हमासद्वारा सञ्चालित स्वास्थ्य मन्त्रालयले पछिल्ला २४ घण्टामा कुपोषणका कारण थप सात व्यक्तिको ज्यान गएको जानकारी दिएको छ, जसले त्यहाँको दयनीय अवस्थालाई झन् उजागर गरेको छ।

बेलायतको यस्तो कदमले इजरायल–प्यालेस्टाइन द्वन्द्वमा नयाँ मोड ल्याउने संकेत देखिएको छ।